'Blʋajei 'a ‑tein
132
'Dʋ nyʋ a blea ‑bo nyɔ ɔ sea 'de Tʋ "bo 'a ‑gbɛɛ'‑ na' muɛ.
'Oo Tʋ "bo, ‑ɩn po Dafi ke,
ɔɔ' 'kle ‑wee'‑ "klein ɔ 'jea' ‑tɩ' ‑kwlʋ o.
2 Dɛ ‑nʋɛ ɔ cɛn wlu ‑tie" 'de Tʋ "bo ‑pee,
‑wɛe ɔ 'da ka 'de ‑Sakɔbʋ 'a "ikma Kea ‑pee:
3 "ɩɩn‑, 'de poo" ‑sɔn 'ɩn "tia 'ɩn se 'e pa i,
'ɩn se 'ma 'pɛna' pai,
'ɩn se 'kpʋ 'e ‑sai,
4 'ɩn seɛ "i nɩ, "nyɩɔ 'je 'ʋn "jri "kpei jii‑,
'ɩn se "jri ku "kpei po i,
5 ‑bo 'ɩn se ‑ta Tʋ "bo 'a ‑nɩ ‑gbu",
Sakɔbʋ 'a "ikma Kea nɩa "jriɛ 'jee ɛ.
6 Kɩɩn, ‑a ‑wɩɩn' ʋʋ 'na 'de Eflata,
'bo mɔ Kea 'a kɛ' ‑gbau' ‑ɛ ‑teea kpɔi" nɩ‑,
‑a ‑jeeɛ' de Yaa o ‑kle.
7 ‑A mu ‑ta Tʋ "bo nɩa! ‑A mu 'kɔi i "sii 'de ɛ "juɛi,
8 Tʋ "bo, ‑ɩn ‑sɔn 'ʋn,
‑wɛe ‑ma ‑tein pɛe 'a blua' nɩa, ‑ɩn ‑je o ji,
'oo! ‑Ɩn ‑ke ‑ma kɛ' ‑gbau',
ɛ 'di ‑ma "ikmaa' nʋa jrɛjrɛ nɩa' ji.
9 'Ma muɛ ɛɛ' 'sraa ‑saʋn ‑pɔia" ʋn paa',
'de ‑ma nyʋ ‑ʋʋa' pooa wlu fai",
ʋʋ 'je 'mʋa‑ ‑cnuɛn" ‑saa.
10 'De Dafi ‑nɩa ‑ma dbonʋɩ,
‑ɔɔ ‑tɩ' ‑ɩn ‑kma 'a ‑tɩ',
'beɔ ‑pooa 'cna "jru, ‑ɩn ‑bo ɔ ‑jei" ‑saa.
11 Tʋ "bo cɛn ɛɛ' dɛtu 'a wlu ‑tie" 'mɛ 'de Dafi ‑pee,
ɛ se wlu fai" poo i:
"ju ‑wlʋa 'de ‑ma "ji 'di,
mɔ 'ɩn 'je ‑ma Tʋ"bokpatɛ‑ "kpei ‑te'.
12 'De ‑bo ‑ma "nynuu‑ ‑te' 'ma dbɛɛdɛ 'ɛ ni',
‑wɛe ʋʋ 'je 'ma kɛ' 'ma mua ʋʋpʋ‑ nyɩa'' wɔn 'jeɛ,
‑mɛ ʋʋa' ‑nɩ "nynuu‑ ‑wi" ‑wee'‑ ‑ke ɛ,
ʋʋa muɛ ‑ma Tʋ"bokpatɛ‑ "kpei ‑tea', mamaʋ 'sʋ.
13 kɛ' nɩ ‑cɛɛn'‑,
Selisalɛmʋ mɛ ‑ɛɛ "dia Tʋ "bo a 'je,
kɩɩn, 'bomɔ ɛ nɩ "i ɛ 'je "ti:
14 ɛmɛ ‑nɩ 'ma ‑tein,
‑ta 'ma mua "tia' 'wɩ 'oo 'wɩ ‑wee'‑ 'di ɛ,
Siɔn ‑ɛɛ "dia 'ma 'jea.
15 Kɩɩn, 'ma muɛ Siɔn "diwan‑ pooa',
dɩ 'dɔe 'jeɛ i siie‑,
‑wɛe 'ma mu ɛɛ' nɩa" nyʋ ‑wee'‑ "klein diiɛ "nyɩa.
16 'Ma muɛ ɛɛ' dbonʋʋ 'pʋ bai" 'ʋn paa',
‑wɛe ɛɛ' 'cɛ ‑ʋʋa' pooa wlu fai",
ʋʋ 'je "jɛi "i ‑pliin" 'de 'mʋa‑ 'ʋn.
17 'Bo mɔ, 'ma muɛ nʋa',
Dafi 'a "ikmaa' je "kpei 'kpa,
‑wɛe ka ‑tau 'a wan,
'ɩn 'je 'beɔ ‑ɔɔ mua ɔ ‑kwɔ o "siia, 'cna "jru po.
18 'Kaa' ‑tɩn' a muɛ ɔɔ' tʋnyʋ 'a ‑pʋn" ‑tu" dɩ nɩa',
‑wɛe ɔɔ' Tʋ "bo ‑gbla 'je fan 'de ɔ "jru.